जड़कला

(छत्तीसगढ़ी बोली)

किसान मन के सोनहा धान
लुआँ मिंजा के घर आगे
मेहिनत के फल मिलगे
कोठी डोली म धान धरा गे।।

अग्घन, पूस के महीना म संगी
लद-लद जाड़ जनाए
कथरी, कमरा, अउ साल ओढ़े
गोरसी म आगी सुलगाए।।

कतको कपड़ा पुर नई आवय
जड़कला हर जब आथे
ताते कपड़ा अउ ताते जिनिस
सबों के मन ल भाथे।।

नोनी, बाबू अउ, लइका सियान
जाड़ म ठिठुरत काँपय
संझा बिहनिया जम्मो जुरमिल
भुर्री बार के तापय।।

कुहरा निकलय मुहुँ डहर ले,
नहाय बर मन ढेरियाय
उठत बिहनियाँ सुरुज के अगोरा
घाम ह बने सुहाय।।

तिवरा भाजी, राहेर के बटकर
सबो के मन ल भाय
चिरपोटी पताल के चटनी संग
अंगाकर गजब मिठाय।।