हे गणपति

छत्तीसगढ़ी

रिद्धी-सिद्धि के तै स्वामी,
तोरेच गुन ल गावत हँव।
सजे सिहासन आके बइठो,
पँवरी म माथ नवावंत हँव।।

हे गणपति, गणनायक स्वामी,
महिमा तोर बड़ भारी हे।
माथ म मोर मुकुट सजत हे,
मुसवा तोर सवारी हे।।

साँझा बिहिनिया करँव आरती,
लडवन भोग लगावंत हँव।
सजे सिहासन आके बइठो,
पँवरी म माथ नवावंत हँव।।

माता हवय तोर पारबती
अउ पिता हवय बम भोला।
दिन दुखियन के लाज रखौ,
बिनती करत हँव तोला।।

पान-फूल अउ नरियर भेला,
मै हर तोला चघावंत हँव।
सजे सिहासन आके बइठो,
पँवरी म माथ नवावंत हँव।।

अंधरा ल अखीयन देथस
अउ बाँझन ल पुत देवइयाँ।
बल,बुद्धी के तै हर दाता,
सबके बिगड़े काम बनइयाँ।।

हे गणराज, गजानंद स्वामी
मै हर तोला मनावंत हव।
सजे सिहासन आके बइठो,
पँवरी म माथ नवावंत हँव।।