आगे संगवारी हरेली तिहार

(छत्तीसगढ़ी कविता)

मनाबो संगी हरेली तिहार,
धरती माई ह देवत उपहार।

बारह मास मॅं हरेक परब,
हमर संस्कृति हमु ला गरब।
चलो मनाथन पहली तिहार,
धरती माई ह देवत उपहार..

अन्न उपजइया गंवइया किसान,
भूंईया के हरे इही भगवान।
हरियर दिखत हे खेत-खार,
धरती माई ह देवत उपहार..

गरुवा-गाय बर बनगे दवा,
रोग-राई भगाय बर मांगे दुआ।
घर के डरोठी मॅं खोंचत डार,
धरती माई ह देवत उपहार..

रुचमुच रुचमुच बाजत हे गेड़ी,
सुग्घर दिखत हे संकरी बेड़ी।
रोटी-पीठा महकत हे घर दुआर,
धरती माई ह देवत उपहार..

रापा, कुदारी, बसुला, बिंधना,
धोवा गे नागर सजगे गना।
रहेर हरियागे दिखत मेड़-पार,
धरती माई ह देवत उपहार..

पेड़ लगाबो चलो जस कमाबो,
मिल-जुल के हरेली मनाबो।
छत्तीसगढ़ मैइया होवत श्रृंगार,
धरती माई ह देवत उपहार..

प्रकृति ल सुग्घर सॅंवारना हे,
भारत भूंईया ल सरग बनाना हे।
खुशी मनावत श्रवण तिहार,
इही हरे ग जीवन के उपहार..

मनाबो संगी हरेली तिहार,
धरती माई ह देवत उपहार।