जाड़ के दिन आगे

(छत्तीसगढ़ी कविता)

कथरी कमरा साल ओढे
लदलद जाड़ जनावय जी

सरसर सरसर हवा धुकत हे
जाड़ के दिन आगे जी

अघन पुश के जाड़ म संगी
दांत हर कटकटाथे जी

मुहु डहर ले कुहरा निकले
गरम जिनिस सुहाथे जी

सांझा बिहिनिया सित बरसे
घाम तापे बर जिवरा तरसे

चारो कोती कुहरा छागे
जाड़ मा सब मनखे जडा़गे

बार के अंगेठा अउ भुर्रि ला
मनखेमन आगी तापे जी

सेटर मफलर साल ओढ़े
गोरसी मा आगी तापे जी

जेन घाम हर गरमी म
सबो ला टोरस लागय जी

आज जाड़ म उही घाम हर
सबो ला घाते सुहावय जी