करिया अउ वोखर रूख

(छत्तीसगढ़ी बोली)

करिया ल बनेच रिस आगे,
ओखर तत घलो छरियागे,
मोर लगाय रूख
ल काट के कोन लेगे,
मोर हिरदे ल बड़ दुख देगे,
मोर कइ पीड़ही बर
छैंहा बनाय रहेंव,
सुखी रही संहंस लिही
तेखर जोगाड़ जमाय रहेंव,
लइका ह इसकुल
ले घर आके बताइस,
के गुरूजी कहे हे
एक ठन रूख अपन
दाई के नांव म लगाबे,
पानी पलो के
वोला बड़का बनाबे,
करिया अकचका गे,
सुन के झंवुहागे,
खटिया म बइठे
रहिस त नइ गिरीस,
पानी ठोंके म
संहंस हर फिरिस,
अब आन संग अपन
आप ल कइसे समझावां,
अपन पीरा ल काला बतावां,
जब पइसा वाला मन
दोगलाई म उतर जाथें,
त हमर अस गरीब
के जंगल ल कटवाथें,
हमर पुरखा मन
अपन महतारी भुंइया के
हरियर रूख ल
कभु नइ काटिन,
ए जंगल ह हमर
दुख दरद ल बांटिन,
फेर कथनी करनी
के फेर ल देखव
तमनार अउ हसदेव
जइसन जंगल के
हजारों लाखों पेड़ ल कटवाथे,
हमर बरबादी ल देस
के बिकास बताथे,
करिया अंजोर बाला
टारच ल बार
हमला रद्दा झन देखावा,
हुसियार बन हमी
ल झन बहकावा,
पइसा वाला तैं पइसा
के मया म मरत हस,
चेत जा हमर नास कर
तैं आगी ल धरत हस,
कोनो दिन तो हमरो बेरा आही,
तोर मन मंसा ह कब,
कइसे मेटा जाही।