जंगल म चुनाव

अशोक कुमार यादव
मुंगेली (छत्तीसगढ़)
********************

छत्तीसगढ़ी कविता

पाँच बछर बीतगे संगवारी हो,
फेर होही जंगल म चुनाव।
आबेदन भराय ल चालू होगे,
लिखव फारम म अपन नाँव।।

बेंदरा मन बने हें कोटवार,
हाथ म धरे दफड़ा ल बजाथें।
ए पेड़ ले ओ पेड़ म कूदके,
हाँका पार-पार के बलाथें।।

काली पहाड़ी म बईठक होही,
सुन सियान मन सुंतियागें।
हमू बनबो सरपंच कहिके,
जानवर मन जम्मों जुरियागें।।

शेर कहिथे-मँय जंगल के
राजा आँव, अकेल्ला होहूँ खड़ा।
कोन लिही मोर से टक्कर,
काखर म दम हे गोल्लर सड़वा।।

हाथी कहिथे-तोर कानून नई चलय,
जनता के अब राज हे।
जेला चुनही जनता, जीतही चुनाव,
तेखर मूड़ी म ताज हे।।

लेह-देह म मानगे शेर,
कोन-कोन खड़ा होहव ए बतावव।
का-का करहू बिकास तुमन,
अपन घोसना पत्र सुनावव।।

शेर छाप म शेर खड़ा होही,
कोलिहा छाप म कोलिहा ह।
हाथी छाप म हाथी खड़ा होही,
बिघवा छाप म बिघवा ह।।

शेर कहिथे-जंगल ह स्वर्ग बनही,
कोनों नइ मरँय भूख।
गढ़बो नवा-नवा योजना,
सुघ्घर फूल खिलही डारा-रुख।।

चुनाव परचार होए लगिच,
माड़ा, खोंधरा, बिला, गऊठान।
जीतवाहू कहिके हाथ-पाँव ल
जोरँय, हमरे हवय निशान।।

वोट डरगे कोलिहा छाप म,
भारी मत ले होगे ओखर जीत।
शेर, हाथी अऊ बिघवा पुछी
डोलावंय, इही दुनिया के रीत।।

आपको यह रचना अच्छी लगे तो साझा अवश्य कीजिये और पढते रहे hindirakshak.com राष्ट्रीय हिन्दी रक्षक मंच से जुड़ने व कविताएं, कहानियां, लेख, आदि अपने चलभाष पर प्राप्त करने हेतु राष्ट्रीय  हिन्दी रक्षक मंच की इस लिंक को खोलें और लाइक करें 👉hindi rakshak manch 👈… राष्ट्रीय हिन्दी रक्षक मंच का सदस्य बनने हेतु अपने चलभाष पर पहले हमारा चलभाष क्रमांक ९८२७३ ६०३६० सुरक्षित कर लें फिर उस पर अपना नाम और कृपया मुझे जोड़ें लिखकर हमें भेजें…🙏🏻.